熱刺欲揮軍擒天鵝

熱刺皇牌夏利卡尼的發揮值得期待。

週日深夜，英超第八輪繼續展開角逐，其中一場由史雲斯主場迎戰熱刺。兩隊最近6次交手，熱刺贏足6次，可見史雲斯根本無辦法對付熱刺。即使史雲斯今仗坐鎮主場，但係來軍熱刺近期聯賽表現亦相當不俗，睇怕史雲斯都劫數難逃。

聯賽7輪過後，史雲斯積9分暫列積分榜第十一位，他們表現出來的進攻和防守水準都是相對平庸，不過不失，排在聯賽中游位置毫不意外。其實史雲斯今季都有驚喜，上季正選前鋒邦尼離隊之後，前鋒B.高美斯火速上位，為球隊貢獻4個入球，要知道他上季總共才射入7球，但以寡敵眾始終不是勝利之道。睇翻今場訪客熱刺，其近期一直保持住一貫穩定的發揮，主力陣容同上季相差無幾，而且重點係過去幾次交手史雲斯無一勝績，今餐都唔慌會食得安樂。

熱刺目前積12分排在積分榜第六位，最近聯賽一直保持穩定發揮，偶有驚喜表現，最值得一提的是上一輪聯賽主場擊敗今季曾經勢不可擋的曼城，而且狂灌4球直接打穿成條曼城防線。熱刺最恐怖噶地方就係全隊都有能力攻破對手大門，多點開花令對手防不勝防。熱刺聯賽至今射入9個波，分別由8名球員合力完成，其中後衛艾歷迪亞貢獻2個。上賽季隊內神射手夏利卡尼雖然都只係入得1球，但其係串聯球隊方面做得相當出色，隊中領袖之位越坐越穩。然而值得留意噶係，熱刺陣中傷患較多，中場賴恩美臣、迪比利、賓泰利比、比查特和前鋒孫興民都有傷在身，幸好兵強馬壯的熱刺陣容實力夠曬深厚，幾位傷員對戰術佈置影響不大。加上近年聯賽對陣史雲斯都唔會錯過攞分機會，球員心理佔據主動，熱刺此行勝利在望。