國際主戰卡利亞里有肉食

國際前鋒伊卡迪食糊能力無需懷疑。

　　今個禮拜歐洲球壇都頗為忙碌，週末固然例牌有各國聯賽上演，而週中亦都會有多個國家的國內盃賽重燃戰火，其中係意大利就將有國際米蘭和祖雲達斯等豪強紛紛亮相意大利盃第五圈。而係同圈8場對碰中，禮拜三凌晨開波的國際米蘭主戰乙組仔卡利亞里就絕對屬於有肉食的賽事。

　　經過數載浮沉後，國際今季終於大打爭氣波，16輪戰罷36分在手暫為聯賽一哥的他們距離半程冠軍越來越近。至於今鋪對手卡利亞里目前則為聯賽阿二，但可惜球隊身處的係乙組，彼此實力差距大家心知肚明。而睇返兩隊過去幾年係意大利盃的表現，卡利亞里近5屆最好成績都只係行到去第五圈，至於國際則曾在2011年奪冠，可惜球隊近幾屆都表現失色，急於一雪前恥的他們又點會給予卡利亞里此行爆冷的機會。

　　通常豪門球隊係國內盃賽都會讓陣中老將得到輪休機會，但已經成功換血的國際如今陣容朝氣蓬勃，如上輪聯賽齊齊有波入的攻擊群伊卡迪、祖維迪和波索域皆有氣有力，一週雙賽當食生菜。而且睇返兩隊過去6次交手，雙方均踢得絕不保守，1場入球盛宴出現成數較大。