PSV强攻施禾尼大波格

荷兰波众所周知一向上盘至上，皆因无论有无咁嘅本钱都一于秉承进攻就系最好嘅防守呢个教条。而喺礼拜日晚上就有一场大波格嘅赛事推荐畀大家，荷甲一哥PSV燕豪芬届时将去到施禾尼嘅地头作一番讨教。鉴于PSV燕豪芬开季至今状态好到冇朋友，而且进攻火力更加傲视群雄，一场入波盛宴即将拉开帷幕。

其实主队施禾尼近期表现绝不失礼，球队过去7轮联赛保持不败，联赛排名亦已经再度攀升至三甲之列，距离榜首兼今仗对手PSV燕豪芬亦只有8分差距，追分欲望实属司马昭之心。但正所谓一山还有一山高，一哥PSV燕豪芬喺头11轮联赛居然赢足10场，而且过去7轮联赛则直头处于遇神杀神遇佛杀佛嘅忘我境界(7仗攻入27波)。其中由卢卡迪亚、云真高和罗辛奴组成嘅进攻铁三角更加堪称PSV燕豪芬喺前线嘅最大杀器，皆因佢哋三人联赛至今不仅联手攻入25波，而且喺神射手榜上亦可以喺前五名当中发现到佢哋嘅身影，试问施禾尼今铺又点去阻挡PSV燕豪芬如潮水一般嘅攻势。

睇返盘路方面，鉴于双方过去6次交手都以大手笔交收收场，今铺再度支持上盘可谓理所当然。与此同时，如果话想串返条过关飞，相信赢面极大嘅PSV燕豪芬会系铁胆嘅好选择。