騎士盼笑傲東西岸榜首戰

對於打工仔而言，禮拜一、二肯定最為難挨，不過相當「纏身」的NBA基本每日都好戲不斷，其中係禮拜二早上就有1場東西岸榜首大戰會畀大家解下返工鬱悶，騎士與勇士將於克里夫蘭一決高下。係雙方今季首次對碰當中，騎士最終無奈送畀勇士一份聖誕禮物，正所謂仇人見面分外眼紅，適逢勇士近期狀態出現起伏，騎士定必唔會錯過如此復仇良機。

經歷六連客之旅的騎士今鋪擺駕回宮迎戰聯盟風頭躉勇士可謂撞正吉時，點解咁講？因為今季變身為「紀錄鬼見愁」的勇士正遭遇開咧至今最為嚴峻之考驗，對於如今輸波先係新聞的他們，球隊在過去3場常規賽竟然輸足2場，而且對手皆係平民球隊金塊及活塞，簡直令人O曬嘴。其實分析返呢兩場的「死因」，後衛史提芬居里依舊準到無朋友，但全能前鋒特雷蒙格連1場缺陣，1場就7中1僅得5分，而係勇士今季首次遭遇騎士時，特雷蒙格連當時貢獻22分、15個籃板及7次助攻的華麗數據，係球隊取勝的重要功臣，若果他未能及時搵返狀態，勇士肯定先蝕一章。

而目前另一個困擾勇士的問題就係後備陣容太弱。論正選五虎，勇士足以笑傲全聯盟，但以聯盟一哥勒邦占士為首的騎士正選亦絕對唔講得笑，其中狀態持續上升的核心後衛K.艾榮更加已開腔表態期待復仇勇士。但若比較後備陣容，上季FMVP得主伊古奧達拿領銜的勇士板凳席就明顯有所不足，佢本人亦已經連續2場常規賽得分食蛋。相反騎士有外線防守大閘艾文舒伯特、球風兇悍的澳洲控衛迪拉域度華等戰將，實在不容小覷。而後備球員之間的比拼亦將是今仗爭勝的一大關鍵因素。另外值得一提的是，在職業生涯過去28次面對勇士的賽事中，勒邦占士均場可斬落30.4分，用予取予求去形容都絕不為過。