长胜湖人「独」自去偷欢

湖人巨星勒邦占士(右)面对卢卡当锡(左)有明显心理优势。

　　周六上昼有多场NBA常规赛陆续开打，当中最吸引眼球嘅绝对系独行侠主场迎战湖人。紫金军团今季几咁威勐大家有目共睹，近期一波六连胜后胜率再次提升到八成以上，西岸头把交椅估计有排都唔会易主。反观独行侠最近略显飘忽，加上过去几次面对湖人输多赢少，即使人手方面可能相对齐整，兼且坐拥主场优势，各位观众今铺亦不宜期待太多。

进入NBA第二年嘅卢卡当锡持续绽放「欧洲MVP」光芒，赛季至今两个半月已过接近半程，呢位独行侠新任头牌出战33场就斩获过11次大三元，未满21岁嘅年龄同其过分沉稳嘅技术风格以及个人豪华成绩单根本唔对等，确实能令广大球迷不自觉地感歎「英雄出少年」。虽然球队经常打出活力四射嘅进攻高潮，三次净胜40分以上就系力证，无奈球队战绩唔算太突出，23胜14负排西岸第六，点睇都系唔够火候，尤其是频频被诟病比赛每当去到关键时刻犹如散失咗大半功力。讲到呢度大家应该唔会唔记得佢哋上仗主场打金块就系最后时刻传接处理失当从而错失出手机会1分之差饮恨；计埋前几场，自从上个月尾大炒勇士之后，球队近6场净系赢过2个主场。争胜力骤降难免会响起唔少呼喊波辛基斯尽快伤癒归队嘅声音，毕竟呢位拉脱维亚高佬均场可以贡献全队第二高嘅17.3分、9.4个篮板外加2.1次封阻，冇佢镇守嘅三秒区甚至沦为对手自出自入地带，卢卡当锡再多大三元都系入不敷出。更不利嘅系，卢卡当锡自从加入NBA以嚟总共同湖人交手过6次、输足5次，期间居然冇任何一次命中率达到五成，包括上个月头作客赢嘅唯一一次，今次究竟有冇办法克服苦主，我哋不妨拭目以待。

圣诞大战告负、经历完今季最长嘅四连败之后，湖人喺2019年底成功反弹，上仗主场轻取纽约人迎嚟一波六连胜，成为联盟第二支突破30胜嘅球队，实力同状态都好过独行侠相信无需置疑。贵为全联盟最硬净嘅盾墙，连续2场失分唔破百嘅紫金军团目前防守效率系全联盟第三好、仅次于公鹿同速龙，与此同时进攻效率亦都高居第四，真可谓攻守兼备；反观独行侠尽管进攻锐利度暂时领跑全联盟，不过防守水准仅属30队当中嘅中游，由此可见双方今季头三次交锋湖人理所当然赢两次稍占上风。不过湖人今仗赢面并非十拿九稳，皆因安东尼戴维斯喺最近打纽约人嘅时候某次对抗中失衡跌伤尾骨离场，好彩检查结果显示无结构性损伤，不过可以肯定嘅系此番唔会披甲出战；另外仲有外围铁闸A.巴特利因身体不适出战成疑。咁球迷最关心嘅勒邦占士咧？根据相关报导，「皇帝」身上出现流感症状，不过贵为头号球星兼且一向好胜心切，外界预测佢今铺好大可能带病上阵。或者发挥会有影响，但勒邦占士今季已完全转型成为联盟助攻王，身边有一班射得、抢得嘅队友，相信佢只要保持平时嘅传波水准，如无意外湖人将会赢得双方近9次常规赛交锋嘅第八次。